Franca nis me dozën e katërt të vaksinës për njerëzit mbi 80 vjeç

Kjo duhet të zbatohet për ata, vaksinimi përforcues  (i tretë) i të cilëve është bërë më shumë se tre muaj më parë

Njerëzit mbi 80 vjeç  në Francë mund të marrin dozën e katërt të vaksinës kundër koronavirusit në Francë. Kështu ka bërë të ditur kryeministri Jean Castex në një intervistë për gazetën franceze “Le Parisien” mbrëmjen e së shtunës, transmeton albinfo.ch.

Kjo duhet të zbatohet për ata, vaksinimi përforcues  (i tretë) i të cilëve është bërë më shumë se tre muaj më parë.

Rreth 58 për qind e njerëzve në Francë kanë marrë tashmë një vaksinë përforcuese.

Ndërsa numri i infeksioneve në Francë kishte vazhduar të bjerë në javët e fundit pas një niveli rekord në fillim të vitit, një numër sërish i madh i infeksioneve është regjistruar sërish së fundmi.

Numri i infeksioneve të raportuara brenda një jave për 100,000 banorë ishte rreth 585 në shkallë vendi. Hapat e mëtejshëm lehtësues do të pasojnë në Francë të hënën.

---