Gjykata e Lartë kthen në Apel çështjen e vulës dhe logos së PD-së

“Gjykata e Apelit duhet të japë një vendim për kërkesat e palëve, nuk mund ta kthejë në shkallën e parë”

Gjykata e Lartë ka vendosur që të rikthejë për gjykim në Apel rekursin që grupimi i Rithemelimit i drejtuar nga Sali Berisha ka depozituar për çështjen e logos dhe vulës së Partisë Demokratike. Gjykata e Apelit e ktheu në shkallën e parë vendimin që njihte Berishën si kryetar të PD-së, përcjell albinfo.ch.

Në përfundim të shqyrtimit gjyqësor, Kolegji Civil i Gjykatës së Lartë arriti në përfundimin se Gjykata e Apelit ka lejuar shkelje procedurale që e bëjnë të cenueshëm vendimin e dhënë prej saj.

Kolegji konstaton se Gjykata e Apelit nuk u ka dhënë përgjigje kërkesave të palëve në ankimet respektive, por është marrë me çështje dytësore që nuk përbëjnë shkak për prishjen e vendimit dhe dërgimin e çështjes për rishqyrtim.

Gjykata e Lartë vlerëson se pretendimet e ngritura në ankimet e paraqitura pranë Gjykatës së Apelit në Tiranë janë çështje të cilat mund të zgjidheshin vetë nga ajo gjykatë.

Në këto kushte, Kolegji Civil i Gjykatës së Lartë vendosi kthimin e çështjes për rishqyrtim në Gjykatën e Apelit, por me një trupë tjetër gjykuese.

 

---