Haradinaj: Më 5 nëntor besoj do të marrim lajmin nga Presidentja për shpërbërjen e Parlamentit

Haradinaj: Zgjedhjet e jashtëzakonshme janë të pashmangshme, 7 dhjetori mund të jetë data e tyre

Kryetari i Aleancës për Ardhmërinë e Kosovës (AAK), Ramush Haradinaj, pas takimit me presidenten Vjosa Osmani, ka deklaruar se vendi duhet të shkojë në zgjedhje të jashtëzakonshme, përcjell albinfo.ch.

Në prononcimin e tij para mediave, Haradinaj tha se presidentja i ka informuar për hapat kushtetues që pritet të ndërmerren, duke theksuar se afati për shpërbërjen e Kuvendit përfundon më 5 nëntor.

“Presidentja kërkoi nga ne që të sqarojmë nëse ekziston shumica parlamentare për formimin e qeverisë, sikurse që kërkoi të gjendet një zgjidhje e përkohshme për Buxhetin dhe për Fondet e BE-së. Në realitetin e tashëm, po shkojmë drejt zgjedhjeve parlamentare,” tha Haradinaj.

Ai theksoi se shpërbërja e Kuvendit është tashmë e pashmangshme dhe se caktimi i datës për zgjedhjet e reja duhet të bëhet sa më shpejt.

“Presidentja ka afat deri më 5 nëntor, afat kushtetues, kur besoj se do ta marrim edhe lajmin për shpërbërjen e parlamentit. Do të ishte në interes të Kosovës të caktohet data sa më herët – data 7 dhjetor do të ishte një opsion i mirë,” shtoi Haradinaj.

Sipas tij, mbajtja e zgjedhjeve sa më shpejt është në interes të stabilitetit politik dhe institucional të vendit.

---