Java e Kulturës së Austrisë, shfaqje argëtuese e “AusTroPop”

Java e Kulturës Austriake solli në Tiranë teatrin e rrugës të titulluar “AusTroPop” që mblodhi kureshtarë e të apasionuar, duke dhuruar argëtim për të rritur e fëmijë, përcjell albinfo.at.

Kështu, publiku u tërhoq në mënyrë magjike nga spektakli i artistëve të performancës Irrwisch.

Në kuadër të Javës së Austrisë, Irrwisch prezantoi një shfaqje argëtuese, të bujshme dhe akrobatike “AusTroPop” pasditen e sotme në Tiranë, për të vijuar më pas edhe në Durrës, Vlorë dhe Shirokë.

Shfaqja u krijua enkas për udhëtimin e tyre në Shqipëri dhe sigurisht ka nxitur mjaft kërshëri te publiku.

Java e Kulturës Austriake sjell për publikun shqiptar një sërë aktivitetesh që kremtojnë kulturën, artin, muzikën dhe traditat e këtij vendi mik.

Sezoni i ri i Javëve Ndërkombëtare të Kulturës nisi në 1 shtator me Britaninë e Madhe, e vijon me Javët e Kulturës Suedeze, Egjiptiane, Gjermane, Kineze e Japoneze. /ata