Kosovë: Ndihma për të prekurit nga vërshimet, kontribuon edhe diaspora

Gati gjysmë milioni euro janë grumbulluar në një ngjarje të organizuar drejtpërdrejt nga aktori Fatmir Spahiu dhe Radio Televizioni i Kosovës, si ndihmë për komunat që u përballën me vërshimet.

Me moton ‘Bashkë ia dalim’ për rreth 2 orë në transmetim të drejtpërdrejtë mijëra qytetarë nga Kosova, por edhe diaspora, u lajmëruan për të dhënë donacione si ndihmë për rimëkëmbje të familjeve të dëmtuara, shkruan albinfo.ch.

Në mesin e shumë telefonuesve kishte edhe nga diaspora, kryesisht nga Zvicra e Gjermania, të cilët u lajmëruan duke ofruar shuma të parave si ndihmë për komunat e prekura nga vërshimet.

Në mesin e donatorëve kishte edhe shumë fëmijë, të cilët ofruan kursimet e tyre si ndihmë.

Ndryshe nga reshjet e ditëve më parë, të cilat prekën kryesisht komunat Skënderaj, Mitrovicë, Klinë e Istog, vërshimet konsiderohet se shkaktuan dhjetëra miliona euro dëme si në ekonomi familjare, po ashtu edhe në bujqësi e biznese.