Kosovë, shkon në 111 numri i të vdekurve nga COVID-19

Foto: SHSKUK

Është bërë e ditur se numri i viktimave të COVID-19 në Kosovë ka mbërritur në 111.

Nga dje sa ishin 108 viktima, sot në raportin e Ministrisë së Shëndetësis thuhet se janë shënuar edhe tri vdekje, duke shënuar 111 viktima nga Covid19.

E të infektuar që po trajtohen në QKUK dhe 7 spitale të vendit, sipas të dhënave të fundit, janë gjithsej 306 pacientë. Prej tyre, 217 janë me oksigjeno-terapi dhe 11 të intubuar, transmeton albinfo.ch.

Duhet theksuar se në Klikën Infektive, ku edhe është numri më i madh i pacientëve që po trajtohen, gjithsej 96, 60% e tyre janë në oksigjeno-terapi. 5 nga pacientët janë në gjendje të rëndë shëndetësore.

Ndërkaq, në një konferencë për media, ushtruesi i detyrës së drejtorit të SHSKUK-së, Valbon Krasniqi, ka njoftuar se edhe spitali i Vushtrrisë do të shfrytëzohet vetëm për pacientët e prekur me COVID-19.

Gjatë së martës kanë filluar punën edhe 50 mjekë dhe 62 infermierë, duke përfshirë këtu edhe laborantë dhe mikrobiologë. Një pjesë e tyre do të shërbejnë në QKUK dhe pjesa tjetër nëpër spitale rajonale.

Ministria e Shëndetësisë ka njoftuar se në Laboratorin e Mikrobiologjisë Molekulare në IKSHPK janë duke u testuar rreth 400 mostra të marra në SHSKUK dhe nga gjurmimi i rasteve në terren, por rezultatet e tyre do të bëhen të ditura të mërkurën, në orën 15:00. MSH-ja thotë se tash e tutje rezultatet do të bëhen të ditura çdo ditë në orën 15:00. /Albinfo.ch