Kurti flet për përgjimet e Kusari-Lilës: Situatë e montuar, qytetarët e dinë kush ka bashkëpunuar me Radoiçiqin

Sot, kryeministri i Kosovës, Albin Kurti, ka folur për përgjimet e reja që janë publikuar ku dëgjohet shefja e Grupit Parlamentar të LVV-së, Mimoza Kusari-Lila, duke biseduar me kriminelin serb, Milan Radoiçiq, përgjegjësin kryesor të sulmit në Banjskë, përcjell albinfo.ch.

Kurti ka thënë se për këtë rast zëdhënësi i LVV-së ka dhënë përgjigjen e saktë, derisa ka shtuar se qytetarët e dinë pse Radoiçiqi tash po ikë e dikur ishte në kryeministri.

“Unë vetë nuk i kam dëgjuar, por qytetarët e dinë se kush ka bashkëpunuar me Radojiçiqin dhe e kanë shumë të qartë pse Radojiçiq ka ikur tash dhe e dikur ishte në Kryeministri. Për këtë zëdhënësi i subjektit ku unë jam kryetar i LVV-së, Arlind Manxhuka, e ka dhënë përgjigjen e saktë”, tha Kurti.

Kryeministri para gazetarëve shtoi se “ajo është një situatë e montuar dhe Radoiçiq këtë muaj i bënë 9 muaj që ndodhet i lirë në Serbi dhe trysnia do të duhej të ishte që të ketë aktakuzë ndaj tij”.

Teksa u pyet edhe nëse do të merren masa ndaj Kusari-Lilës, Kurti tha “po e kuptoj që po përpiqeni të dramatizoni me çdo kusht disa sekonda prej një bisede që nuk e di si është marrë e ku është marrë, si u pre e nga kush u organizua. Por edhe një herë unë jam kryetar i VV-së dhe Mimoza Kusari nuk është anëtare e VV-së. Edhe po të ishte anëtare e VV-së për këso gjërash, ka komisione, nuk e ka VV-ja kryetarin diktator që merr vendime siç do të kishte dëshiruar ndokush”.