Kurti, i ftuar i Macronit në Pallatin Élysée

Kryeministri në detyrë i Republikës së Kosovës, Albin Kurti, ka marrë pjesë në një darkë solemne të organizuar nga Presidenti i Francës, Emmanuel Macron, në Pallatin presidencial Élysée në Paris.

Ngjarja është zhvilluar në kuadër të Forumit të 10-të të Paqes, një iniciativë ndërkombëtare që tradicionalisht mbledh liderë shtetesh, figura të njohura botërore dhe përfaqësues të organizatave globale për të diskutuar çështje që lidhen me paqen, sigurinë dhe bashkëpunimin ndërkombëtar.

Darkat në Élysée shënojnë hapjen zyrtare të forumit, i cili synon të forcojë dialogun mes vendeve dhe të nxisë bashkëpunimin përballë sfidave globale.

Gjatë qëndrimit të tij në Paris, pritet që Kurti të marrë pjesë në sesionet e forumit dhe të zhvillojë takime bilaterale me liderë dhe përfaqësues të vendeve pjesëmarrëse.