Kurti informon Begajn për takimin e Ohrit

Presidenti i Shqipërisë, Bajram Begaj, ka pritur në takim kryeministrin e Kosovës, Albin Kurtin. Preaidenca e Shqipërisë njofton se u bisedua rreth negociatave të zhvilluara së fundmi në Ohër mes Kurtit dhe presidentit serb, Aleksandër Vuçiq.

Presidenti Begaj përshëndeti lidershipin, maturinë dhe kurajën e treguar nga Kryeministri Kurti dhe ekipi negociator i Republikës së Kosovës, për ta pranuar planin evropian, si dhe për ta nënshkruar e zbatuar atë, thuhet në njoftim, transmeton albinfo.ch.

Më tej, Bajram Begaj shprehu besimin se zotimi i marrë nga palët në Ohër do të respektohet plotësisht, ndërkohë do të gjenden mekanizmat e duhur për ta kthyer këtë dakordësim publik në një marrëveshje të detyrueshme e të zbatueshme për palët ndërkombëtarisht.