Kurti nis vizitën në Austri, pritet në Akademinë Austriake të Shkencave

Qëndrimin në Austri, Kryeministri i Republikës së Kosovës, Albin Kurti, e filloi me një takim në Akademinë Austriake të Shkencave, ku u mirëprit nga Kryetari i Divizionit të Shkencave Humane dhe Sociale, Prof. Oliver Schmitt dhe dy hulumtuesit në njësinë e Studimeve Ballkanike, Dr.  Joachim Marzinger dhe Dr. Robert Pichler.

Gjatë bisedës u fol për punën e Akademisë në përgjithësi dhe për njësinë e Studimeve Ballkanike në veçanti. Në kuadër të këtij takimi, kryeministri Kurti gjithashtu vizitoi Departamentin e Albanologjisë, ku iu prezantuan botime origjinale të rralla të periudhës së Rilindjes, thuhet në njoftimin e zyrës së kryeministrit, transmeton albinfo.ch.

Akademia Austriake e Shkencave u themelua në vitin 1847. E përbërë nga 25 institute kërkimore në fushën e artit, shkenca humane dhe sociale dhe shkencave natyrore, ajo është institucioni austriak kryesor jouniversitar për hulumtime bazë.

Kryeministri Kurti po qëndron në Austri për të marrë pjesë në Samitin e Liderëve të Socialistëve dhe Demokratëve të Ballkanit Perëndimor, me temën “Zgjerimi i Ballkanit Perëndimor TANI! Për një shoqëri sociale, demokratike, paqësore”.​