Kurti u reagon policëve protestues: Secili pjesëtar i FIT ka pajisje në vlerë 10 mijë euro

Albin Kurti, FB

Kryeministri i Kosovës, Albin Kurti, është përgjigjur pas protestës të së mërkurës, ku pjesëtarë të Njësisë Speciale Intervenuese apo e njohur si FIT protestuan për kushte e paga më të larta.

Kurti theksoi se secili pjesëtar i NJSI-së ka pajisje në vlerë prej afër 10 mijë euro.

“Secili pjesëtar i NJSI-së ka pajisje në vlerë prej afro 10 mijë euro. Të ardhurat mesatare të shumicës dërrmuese të pjesëtarëve të kësaj njësie elitare sivjet shkuan mbi 2.200 euro në muaj (paga bazë plus shtesat). Tash do ta kenë edhe shtesën e rrezikshmërisë prej 150 euro në muaj, përderisa vazhdon kjo situatë në veri të vendit, e që është niveli më i lartë i kësaj shtese. Në fund të muajit nëntor i bie që përveç pagës së rritur, secili prej tyre do të marrë edhe shumën neto prej 1.350 euro retroaktivisht (shtesa e rrezikshmërisë shkurt-nëntor 2023)“, shkroi Kurti.

Mes tjerash, kryeministri i Kosovës tha se janë 203 policë të Kosovës që sivjet patën të ardhura më të larta sesa Presidentja e Republikës.

“Nevojat, jo vetëm dëshirat, janë përherë e shumë herë më të thjeshta se zgjidhjet. Jetojmë në Kosovë, ku BPV për kokë banori në muaj është rreth 460 euro. E sivjet, 2.134 policë të Kosovës, apo gati 27% morën më shumë se 1.000 euro në muaj mesatarisht. Janë 203 policë të Kosovës që sivjet patën të ardhura më të larta sesa Presidentja e Republikës (1.890 euro bruto, koeficienti 18), e në muajt qershor e korrik ishin afër 700 sosh (ku sigurisht bëjnë pjesë shumica absolute e pjesëtarëve të NJSI-së)”, thuhet në reagimin e kryeministrit Kurti.