Qyteti në Zvicër që do të zgjedhë se cilit kanton do t’i takojë

Qyteti me vetëm 7,700 banorë kishte votuar më 2017 për t'u bërë pjesë e Jura-s, por rezultatet u anuluan mes dyshimeve për mashtrim të votuesve

Të dielën banorët e qytetit Moutier, me banorë frengjistfolës, do të hedhin votat e tyre përsëri nëse do të qëndrojnë në Kantonin e Bernës, kryesisht të gjuhës gjermane, ose do të bashkohen me kantonin fqinj Jura, ku flitet frëngjishtja, transmeton albinfo.ch.

Qyteti me vetëm 7,700 banorë kishte votuar më 2017 për t’u bërë pjesë e Jura-s, por rezultatet u anuluan mes dyshimeve për mashtrim të votuesve.

Ndërsa çështja është e diskutueshme dhe emocionuese për shumë banorë të zonës, autoritetet komunale u bëjnë thirrje banorëve të qëndrojnë të qetë pas shpalljes së rezultateve të votimit.

Për të shmangur konfliktin të dielën midis fraksioneve pro Bernës dhe pro Jura-s, zyrtarët kanë ngritur dy zona të ndara në anë të kundërta të qytetit dhe po i bëjnë thirrje secilit grup të “respektojë këtë ndarje të qytetit dhe të mos kalojë vijën e ndarjes”. /Albinfo.ch

---