Lirohet nëna e akuzuar për mbytjen e foshnjës me drogë

Foshnja kishte vdekur në vitin 2009, pasi që, sipas akuzës, në shishen e qumështit i ishte hedhur heroinë dhe kokainë

Është liruar nga përgjegjësia nëna 25 vjeçare që akuzohej për shkaktim të vdekjes së foshnjës së saj shtatëmuajshe. Foshnja kishte vdekur në vitin 2009, pasi që, sipas akuzës, në shishen e qumështit i ishte hedhur heroinë e përzier me kokainë.

Gjykata e Qarkut në St. Gallen, me gjithë dyshimet e forta, nuk ka mundur të sigurojë të dhëna të pakontestueshme se 25 vjeçja kishte mbytur me qëllim të bijën, kështu që, në mungesë të provave, ka shpallur një aktgjykim lirues.

Në seancat e gjykimit të përfunduar të hënën, nëna e foshnjës së vdekur, me profesion nëpunëse, ka ngulur këmbë se ajo e ka dashur shumë të bijën dhe nuk kishte si ta mbyste atë. Ajo madje ka besuar se me partnerin e saj të ri dhe me vajzën (që e kishte me tjetër burrë) mund të krijonte një familje normale.

Por, sipas palës paditëse, pikërisht partneri i saj ka qenë shkaku për të cilin gruaja tashmë e liruar, e ka mbytur foshnjën. 25 vjeçarja, derisa ende ishte shtatzënë, ishte njoftuar përmes internetit me partnerin në fjalë, ndaj të cilit kishte krijuar një varësi të madhe. Nga kjo varësi dhe nga frika se mund ta humbiste partnerin, i cili ishte i papunë dhe i varur nga droga, ajo madje kishte qenë në gjendje të mbyste edhe foshnjën, konsideronte aktakuza. Kështu, ajo duhej të dënohej për vrasje të rëndë, për vrasje me paramendim ose për vrasje nga pakujdesia.

Nga ana tjetër, mbrojtja ka pleduar për lirim nga akuza, pasi që, sipas saj, për një dënim mungojnë dëshmitë. Versioni i akuzës për përzierjen e drogës në shishen e qumshtit të foshnjës nuk ka arritur të dëshmohet, ndërsa ka shumë shkaqe tjera që mund të kenë sjellë vdekjen e saj nga helmimi me drogë.

Në fund, Gjykata e Qarkut në St. Gallen ka sjellë vendimin lirues për nënën e akuzuar se ka mbytur foshnjën e saj.

“Nuk mund të konstatohet me siguri të plotë se çfarë ka ndodhur në të vërtetë atë natë. Gjendja e provave nuk mjafton për shqiptimin e një dënimi. Por ajo që është e sigurt është se vdekja e foshnjës ka qenë një tragjedi”, ka përfunduar arsyetimin e tij trupi gjykues në St. Gallen.