Marta Kos refuzon propozimin e Vuçiqit dhe Ramës

Komisionarja e BE-së për Zgjerim, Marta Kos, refuzon propozimin e Ramës dhe Vuçiqit

Integrimi i vendeve kandidate në Schengen dhe tregun e përbashkët kërkon reformat e nevojshme dhe mbështetjen e të gjitha vendeve anëtare, thekson Kos, përcjell albinfo.ch.

Komisionarja e Bashkimit Evropian për Zgjerim, Marta Kos, ka hedhur poshtë propozimin e presidentit serb, Aleksandar Vuçiq, dhe kryeministrit shqiptar, Edi Rama, të cilët kërkonin përshpejtimin e integrimit të vendeve kandidate në tregun e përbashkët të BE-së dhe hapësirën Schengen, pa marrë të drejtën e vetos nga vendet anëtare. Lajmin e raportoi gazeta serbe Nova.rs.

Në një intervistë për Politico, Kos tha se nuk është e sigurt nëse Vuçiqi dhe Rama e kuptojnë plotësisht sa duhet të përmbushin vendet nëse duan të bëhen pjesë e Schengenit ose të tregut të përbashkët, duke nënvizuar se procesi i reformave është i vështirë si për integrimin ekonomik, ashtu edhe për anëtarësimin në BE.

Komisioni Evropian ka prezantuar tre opsione për politikën e ardhshme të zgjerimit:

1. Status quo – sistemi ekzistues mbetet i pandryshuar.

2. Integrim gradual – vendet kandidate përfshihen në disa iniciativa dhe programe të BE-së, por pa anëtarësim formal.

3. Integrim fazor (i kthyeshëm) – vendet marrin shpejt anëtarësim formal dhe më pas vazhdojnë të zbatojnë reformat.

Kos theksoi se opsioni i tretë, i integrimit fazor, nuk është i pranueshëm dhe se as status quo-ja nuk është zgjidhje, duke e cilësuar situatën si një sfidë që kërkon konsensus midis vendeve anëtare. Ajo gjithashtu i bëri thirrje shteteve që nuk mbështesin idetë e Komisionit për zgjerimin që të propozojnë planet e tyre.

Rama dhe Vuçiqi, në një intervistë të mëparshme për Frankfurter Allgemeine Zeitung, kërkuan që vendet kandidate të integroheshin shpejt, pa të drejtën e veto-s, argument që sipas tyre do të zvogëlonte shqetësimet e disa vendeve skeptike ndaj zgjerimit të BE-së. Ata gjithashtu vunë në dukje se reforma e brendshme e BE-së mund të jetë e nevojshme për të siguruar që një Bashkim i zgjeruar të mbetet i efektshëm dhe koheziv./Albinfo.ch 

---