Mbi 150 mijë zarfe kanë arritur nga diaspora

Numrin më të lartë të kthimeve e mban Italia me 65 361, ndjekur më pas nga Greqia më pas Gjermania

Procesi i votimit të shqiptarëve që jetojnë jashtë vendit vijon, ndërsa deri sot në orën 11:00, sipas Komisionit Qendror të Zgjedhjeve kanë mbërritur 151 192 zarfe me fletëvotimi.

Sipas të dhënave të publikuara nga KQZ janë 225 701 zarfe të marra nga zgjedhësit, ndërsa në total janë 245 935 zarfe të dërguara. Janë 20 234 zarfe me fletë votimi ende të patërhequra nga votuesit, transmeton albinfo.ch.

Numrin më të lartë të kthimeve e mban Italia me 65 361, ndjekur më pas nga Greqia më pas Gjermania. Sipas qarqeve, kryeson Tirana me 35 389 zarfe, Fier 19 414, Durrës 17 409.

Sipas KQZ-së posta DHL ka detyrimin që të mbajë në zyra zarfet që nuk ka mundur t’ua dorëzojë votuesve dhe që votuesit nuk kanë mundur që t’i tërheqin deri më datën 8 maj.

Çdo votë që mbërrin në Shqipëri në datën 11 maj, pas orës 19:00, do të konsiderohet e pavlefshme.

Vendi i caktuar për administrimin e këtij procesi është Pallati i Sportit “Feti Borova”, pranë Parkut Olimpik Tiranë.

---