Në Bernë janë rikthyer garat në Union Cup

Pas dy viteve pauzë, sot në Bernë të Zvicrës në organizim të FC Prishtina nga Berni dhe Unionit të Klubeve Shqiptare të Futbollit në Zvicër e në mbështetje të FFK-së, është rikthyer gara “Union Cup”, ku do të përcaktohet fituesi i Kupës për klubet shqiptare në Zvicër.

I pranishëm në hapje të këtij eventi ishte edhe presidenti Agim Ademi, pastaj ambasadorët e Kosovës dhe Shqipërisë, Sami Ukelli dhe Ilir Gjoni, Afrim Osmanaj si anëtar i Federatës së Futbollit Shqiptar në Gjermani, si dhe mysafirë tjerë të shumtë, njofton FFK, përcjell albinfo.ch.

Kreu i FFK-së në hapje të garave i përgëzojë të gjitha klubet pjesëmarrëse dhe uroi që kjo garë të ketë vazhdimësi dhe në të ardhmen të masivizohet edhe më shumë, duke pasur parasysh numrin e madh të bashkatdhetarëve tanë në Zvicër dhe dëshirën e madhe të të rinjve për të luajtur futboll.

Ai theksoi se FFK do të jetë mbështetëse e aktiviteteve të tilla dhe shprehu shpresën se në fund të garave si në Gjermani, ashtu edhe në Zvicër do të nxirret ekipi më i mirë.