Këtë vit pritet fluks i mërgimtarëve drejt Kosovës

Njohësit e çështjeve ekonomike thonë se diaspora këtë vit do të jetë infuzion për ekonominë e Kosovës, duke shtuar se numri i mërgimtarëve që do të vijnë në Kosovë do të jetë shumë i madh, për shkak të pamundësisë për të udhëtuar vitin e kaluar si pasojë e pandemisë, përcjell albinfo.ch.

Visari Ymeri, drejtor ekzekutiv në Institutin për Politika Sociale “Musine Kokalari”, ka thënë se ndikimi i diasporës në rritjen ekonomike do të jetë i rëndësishëm këtë vit.

Gjasat janë që mërgata këtë radhë të vijë në numra më të mëdha sesa zakonish

“Diaspora “infuzion” për ekonominë, këtë vit pritet fluks i madh i mërgimtarëve, sepse e kemi pasur vitin e kaluar ku nuk kanë mundur të vijnë për shkak të pandemisë, besoj që këtë herë interesimi që të vijnë në Kosovë do të jetë edhe më i madh. Ky është lajm i mirë për ekonominë e Kosovës, e dyta pastaj që shuma e parave që shpenzohet duke e marrë parasysh edhe vitin e kaluar, mendoj që ka me qenë edhe më e madhe besoj që ndikimi i tyre në rritje ekonomike ka me qenë goxha i rëndësishëm këtë vit. Edhe po e shohim që edhe në vendet e tjera përgjithësi si vende që janë hap pas tejkalimit të rreziqeve nga pandemia, e ka pasë një lloj boomi ekonomik dhe mendoj që e njëjta gjë ka me ndodh edhe në Kosovë, edhe për shkak të mërgatës, por edhe për shkak të rritjes së konsumit të brendshëm në përgjithësi”, ka thënë Ymeri.

Qeveria e Kosovës në planin qeverisës katërvjeçar ka paraparë që nëpërmjet krijimit të instrumenteve për investim, kapitali i diasporës të kanalizohet në investime që krijojnë vende pune. Ky plan i qeverisë ka paraparë që nga viti i parë i qeverisjes të emetohen bono thesari, të dedikuara për diasporën.