Në Shqipëri, toka e punueshme, më e ulëta në Europë

Studim - Toka e punueshme për frymë 0.2 ha, në Shqipëri me ulëta në Europë

Shqipërisë duhet të rrisë produktivitetin e prodhimit bujqësor për shkak se vendi ka sipërfaqen e tokës së punueshme më të ulëtën në Europë, sipas evidencave të Bankës Botërore, përcjell albinfo.ch.

Thuhet se në mënyrë që të ulet varësia nga produktet e importit nevojitet reformim i bujqësie, sidomos në drejtimin të teknologjisë dhe ujitjes, duke marrë në konsideratë edhe ndikimet negative që do të ketë ndryshimi i klimës në rendimentin bujqësor në të ardhmen.

Lidhur me këtë temë, Banka Botërore në një studim të posaçëm për kapacitetet e furnizimit me ujë në të ardhmen evidentoi se vetëm 25 për qind e tokës së vendit është e punueshme me vetëm rreth 0.2 hektarë tokë arë për frymë. Për më tepër, degradimi i tokës dhe erozioni i tokës kanë rezultuar në zvogëlimin e sipërfaqes së tokës bujqësore.

“Shqipëria ka tokën e punueshme më të ulëtën për frymë në Europë, prandaj intensifikimi i bujqësisë në sipërfaqen e punueshme konsiderohet rrugë premtuese për transformimin e produktivitetit të prodhimit bujqësor”, këshilloi Banka.

Ujitja konsiderohet një instrument i fuqishëm që mund të përdoret për të rritur rendimentin në bujqësi. Sasitë e mëdha të tokave të braktisura nga emigracioni dhe lëvizjet e brendshme demografike po degradojnë nga erozioni dhe po bëhen gjithnjë e më pak pjellore.

Më shumë se 20 për qind e tokës shqiptare rrezikon të gërryhet me një shkallë prej më shumë se 5 t/ha/vit. 70 për qind e territorit po gërryhet me 20 t/ha/vit dhe vetëm 10 për qind e tokës është më pak e prekur nga ky fenomen.

Banka lajmëron se produktiviteti bujqësor është i kufizuar nga rënia e pjellorisë së tokës kryesisht prej degradimit të tokës dhe përdorimit joadekuat të plehrave. Burimet ujore të Shqipërisë vlerësohen në 13,000 metra kub për frymë në vit.

Edhe pse Shqipëria është e pajisur me burime të bollshme të ujit të ëmbël, përjeton gjithashtu ndryshueshmëri të lartë të reshjeve, me dimër të butë të karakterizuar nga reshje të bollshme dhe verë të nxehtë e të thatë. Shpërndarja hapësinore dhe kohore e reshjeve dhe temperatura rezulton në ndryshime të mëdha në gjithë vendin.

Rreth 70 për qind e shiut bie nga tetori deri në mars, me shumicën e reshjeve në nëntor, ndërsa korriku dhe gushti kanë nivelet më të ulëta të reshjeve. Ndryshimet klimatike do ta përkeqësojnë më tej situatën, ndaj Banka Botërore këshillon Shqipërisë të rrisë kapacitet e ujitjes në bujqësi. /Monitor

---