Dyshohet se nipi vret aksidentalisht agjën e tij polic në Podujevë

Një zyrtar i policisë së Kosovës është vrarë mbrëmë në fshatin Penuh të Podujevës, ndërsa policia njofton se ka arrestuar një person lidhur me këtë rast.

Ngjarja ka ndodhur mbrëmë rreth orës 21:00 dhe policia thotë se zyrtari policor, Halit Zhdrrella, nuk ka mundur t’i përballojë plagët e shkaktuara nga arma e zjarrit, përcjell albinfo.ch.

“Vdekjen e tij e ka konstatuar stafi mjekësor në QKUK. Ndërsa, lidhur me këtë rast, nga njësitet policore është arrestuar një person i dyshuar: T. Zh, 31-vjeç, i cili me urdhër të prokurorit të shtetit është dërguar në qendrën e mbajtjes për 48 orë, ndërkohë që hetuesit policorë janë duke punuar për të ndriçuar dhe sqaruar të gjitha rrethanat që kanë të bëjnë me rastin, i cili është cilësuar si vrasje nga pakujdesia”, thuhet në njoftimin e policisë.

Mësohet se personi i arrestuar është nipi i të ndjerit dhe se vrasja ka ndodhur aksidentalisht.