Një lojtar nga Kosova kërkon fitoren e Malit të Zi dhe një nga Mali i Zi, të Kosovës

Keystone EPA/VALDRIN XHEMAJ

Fatos Beqiraj, në krye të sulmit të Malit të Zi, në duel me Arijanet Muriqin në portën e Kosovës. 

Një situatë e tillë pritet të ndodhë më shumë se një herë në ndeshjen që të premten mbrëma (sonte, 20:45) e luajnë Mali i Zi dhe Kosova në stadiumin në Podgoricë, shkruan sot Koha Ditore, përcjell albinfo.ch. 

Fare lehtë ka mundur të jetë ndryshe – Beqiraj të jetë në sulmin e Kosovës, e Muriqi në portën e Malit të Zi. 

Beqiraj është lojtar i lindur dhe i rritur në Kosovë, Muriqi është me prejardhje nga Mali i Zi. Rrethana të caktuara kanë bërë që Beqiraj të luajë për Malin e Zi e Muriqi për Kosovën. 

Beqiraj, 31-vjeçar, njihet si sulmues i fuqishëm, që ka bërë karrierë në vende të ndryshme. 

Aktualisht luan për Maccabi Netanyan në Izrael. Ka nisur karrierën në Pejë, te Shqiponja, vazhdoi te Besa, e më pas një fazë të zhvillimit e kaloi te Buduqnosti i Podgoricës. 

Sa luajti për Buduqnostin iu bashkua fillimisht Përfaqësueses U-21 të Malit të Zi e shpejt edhe Përfaqësueses A. Më pas ka luajtur gjatë te Dinamo Zagrebi në Kroaci, e më pas te Changchun Yatai në Kinë, Dinamo Minsk në Bjellorusi, Dinamo Moska në Rusi dhe Mecheleni në Belgjikë.