Numri i azilkërkuesve, i madh edhe në vitin 2013

Drejtori i BFM, Gattiker ka thënë se presioni më i madh i migracionit vjen nga Afrika. Ai ka përmendur si sukses futjen e procedurës 48 orëshe të azilit për shtetasit ballkanikë

Drejtori i Zyrës Federale për Migracion, Mario Gattiker ka deklaruar se numri i kërkesave për azil në Zvicër do të vazhdojë të mbetet i lartë, edhe në vitin 2013.

Për të përballuar të gjitha këto kërkesa, zyra e tij ka nevojë edhe për 50 deri 70 nëpunës të rinj, ka thënë Gattiker në një intervistë për gazetat “Neue Luzerner Zeitung” dhe “St. Galler Tagblatt”.

Ai ka shtuar se për shtimin  e personelit do të bëhet fjalë në rishqyrtimin e radhës që do t`i bëhet buxhetit. Sipas Gattiker-it, që në muajin shkurt të vitit që po shkon zyrës së tij i qe lejuar hapja e vendeve të reja të punës, të cilat janë plotësuar gjatë vjeshtës.

Drejtori i Zyrës për Migracion duke bërë një bilanc të punës së zyrës së tij ka thënë se mund të përmenden zhvillime pozitive. Ndër to ai ka përmendur si sukses futjen e procedurës së shkurtuar 48 orëshe të azilit për shtetasit ballkanikë.

Sipas tij, për dy muaj të funksionimit, kërkesat e azilit nga regjioni në fjalë kanë rënë për 90 për qind.  

Por, Gattiker ka shtuar se presioni i migrimit vjen në radhë të parë nga Afrika. Kjo, sipas tij edhe për faktin se popullsia në Afrikë është katërfishuar gjatë 30 viteve të fundit.