Nxirret nga masa e shkëmbinjve kufoma e të riut

Kufoma e punëtorit 29 vjeçar është gjetur dhe nxjerrë përmes një buldozeri të teledirigjuar nga largësia

Katër ditë pas shembjes së madhe të shkëmbinjve në Gurtnellen, mbi vijën hekurudhore që, përmes tunelit Gothard çon në pjesën jugore të Zvicrës, sot ka mundur të nxirret punëtori që ka humbur jetën nën gurët e shembur.

Kufoma e punëtorit 29 vjeçar është gjetur dhe nxjerrë përmes një buldozeri të teledirigjuar nga largësia, ka njoftuar Policia Kantonale e Urit.

Krahas punëtorit që ka gjetur vdekjen, lëndime kanë pësuar edhe dy të tjerë që janë prekur nga shembja e gurëve.

Që nga e marta, vija hekurudhore e Gotthardit është e bllokuar. Sipas SBB-CFF, zhbllokimi do të marrë rreth 4 javë.

Ndërkohë, rreziku nga shembjet e reja të gurëve në këtë zonë vazhdon të mbetet evident.