Opozita në Shqipëri e ka gati dokumentin për qeverinë transitore

Kreu i Partisë Demokratike të Shqipërisë, Lulzim Basha, pas protestës së zhvilluar mbrëmë, ku u bllokuan rrugët në 5 qarqe, ka thënë se ata nuk po kërkojnë pushtetin në tavolinë, por janë të vendosur për krijimin e një qeverie transitore.

Basha ka theksuar se opozita e ka një platformë të qartë se si mund të funksionojë qeveria transitore. Ai, madje, ka shtuar se kanë gati një dokument që do ta diskutojnë me të gjitha grupet e interesit.

“Opozita nuk kërkon pushtet në tavolinë. Beteja për pushtet bëhet në zgjedhje, kjo betejë bëhet për t’i dhënë fund gjendjes së grushtit të shtetit ku ndodhemi, pa Gjykatë të Lartë, pa Gjykatë Kushtetuese, me prokurorë antikushtetues, me korrupsion rekord qeveritar. Jemi në rekordet e krimit të organizuar, shteti i kapur nga krimi i organizuar, pra në gjendje kolapsi total”, ka theksuar Basha.