Parlamenti kundër migracionit me sistem pikash

Ky sistem u hodh poshtë sepse Zvicra ka nevojë edhe për të huaj me kualifikime më të ulëta, në gastronomi dhe në bujqësi

Dhoma Nacionale e Parlamentit Federal ka hedhur poshtë një kërkesë të grupit parlamentar të SVP-UDC-së për të vendosur sistemin e pikave për dirigjimin e migracionit në Zvicër.

Ky sistem parashihte që në Zvicër të mund të vendoseshin të huajt që plotësojnë kriteret e caktuara, kryesisht nga pikëpamja e ngritjes së tyre arsimore, ose “pikat”. Në këtë mënyrë sipas propozuesve, do të evitohej ardhja e të huajve të padëshiruar.

Sistemi i pikave aplikohet në SHBA, Kanada dhe Australi.

Ndërkaq, kundërshtarët e këtij sistemi u shprehën se ky sistem nuk është i përshtatshëm për Zvicrën. Vendi ka nevojë edhe për të huaj me kualifikime më të ulëta, sidomos në gastronomi dhe në bujqësi, e jo vetëm për të huaj të arsimuar, kanë thënë kundërshtarët.