PDK-ja liron nga detyra zyrtarët me aktakuza

Kryetari i Partisë Demokratike të Kosovës, Kadri Veseli, ka larguar nga të gjitha pozitat partiake dhe institucionale të gjithë zyrtarët e PDK-së që kanë aktakuza të konfirmuara nga institucionet e drejtësisë. Kryetari i PDK-së, Kadri Veseli, në një konferencë për media ka thënë se vendimi nuk e paragjykon fajësinë e tyre. “Së pari po fillojmë me veten, e pastaj këtë standard do ta shtrijmë në çdo segment. Sot, jam para jush për të dëshmuar se jemi të vendosur në këtë betejë”, ka thënë Veseli. Kreu i PDK-së, po ashtu, ka konfirmuar se partia që drejton nuk do të kandidojë e as nuk do t’i mbështesë kandidatët e asnjë subjekti politik që kanë aktakuza të konfirmuara. Veseli, gjithashtu, ka liruar nga detyra edhe të gjithë të zgjedhurit brenda strukturave drejtuese të PDK-së që kanë aktakuza të konfirmuara dhe ky pezullim i funksioneve të tyre, siç tha ai, vlen deri në aktgjykim, transmeton albinfo.ch.

“Ky vendim nuk e paragjykon fajësinë e tyre dhe me përfundimin e gjykimeve, kur ato janë liruese, të gjithë këta persona do ta kenë vendin e merituar në PDK dhe në institucione. Prandaj, unë kam biseduar me zyrtarët tanë partiakë që kanë aktakuza dhe i kam njoftuar ata për lirimin nga detyrat zyrtare që kanë mbajtur”, ka thënë Veseli. Ai tha nepotizmi dhe korrupsioni janë rritur në vendin tonë dhe kjo duhet të ndryshojë me një luftë të pakompromis ndaj korrupsionit dhe nepotizimit.