Policia e Kosovës shton masat e sigurisë rrugore gjatë sezonit të verës

Drejtori i Përgjithshëm i Policisë së Kosovës, Rashit Qalaj, ka njoftuar se pas takimit që ka pasur me stafin menaxhues, përfshirë Drejtorët e Drejtorive Rajonale të Policisë dhe Shefat e Njësive të Trafikut Rajonal dhe Autostradës, ka këkrkuar nga ta aktivitete të shtuara të policisë gjatë sezonit veror, transmeton albinfo.ch.
“Meqë këtë periudhë kohore e karakterizon edhe ardhja e bashkatdhetarëve dhe organizimi i ahengjeve të ndryshme familjare, kërkohet nga policia që të jetë sa më tepër prezent dhe në të njëjtën kohë të ndërmerren masa për ofrimin e sigurisë në trafik dhe masa parandaluese të dukurive të tjera të kundërligjshme”, theksohet në njoftim.
Policia thotë se sipas të dhënave statistikore për gjashtëmujorin e parë të këtij viti krahasuar me periudhën e njëjtë të vitit të kaluar, ka rezultuar se ka rënie të veprave penale dhe të aksidenteve në trafik.
Policia thotë se gjatë sezonit të verës do të shohet prezenca policore në çdo pjesë të vendit, përfshirë rrugët lokale/fshatit, rajonale, nacionale dhe autostrada.
Po ashtu Policia e Kosovës kërkon nga qytetarët që në ahengjet familjare të mos përdoren  armët për të festuar.