Populli i izoluar, politikanët me dy nënshtetësi

Deputetët thonë se është e drejtë e tyre t’i kenë dy nënshtetësi

Kosova është vendi i vetëm në rajon që nuk ka ende liberalizim të vizave me Bashkimin Evropian (BE) kryesisht për shkak të dështimit të klasës politike në miratimin me kohë të Demarkacionit me Malin e Zi, si dhe në luftimin e korrupsionit e të krimit të organizuar. Pavarësisht këtij dështimi, shumica e deputetëve dhe e ministrave të Kosovës e kanë zgjidhur çështjen e lëvizjes së lirë në Zonën Schengen, duke u pajisur me pasaporta të Shqipërisë ose të disa shteteve të Bashkimit Evropian, shkruan sot gazeta “Zëri”.

Ndonëse ka kaluar më shumë se një dekadë prejse Kosova është shpallur shtet i pavarur dhe sovran qytetarët e saj vazhdojnë të jenë të izoluar, gjegjësisht të mos kenë të drejtë të dalin pa viza në hapësirën e vendeve të Zonës Shengen, përcjell albinfo.ch.

Por me një sfidë të tillë nuk ballafaqohet një pjesë e konsiderueshme e deputetëve të Kuvendit të Kosovës, e zyrtarëve të Qeverisë dhe të institucioneve të tjera.

Përkundrazi, shumë prej tyre përveç shtetësisë së Kosovës kanë edhe pasaporta të Shqipërisë dhe të shteteve të tjera të Evropës, për të cilat nuk vlen regjimi i vizave.

Së këndejmi ata mund të udhëtojnë lirshëm jashtë territorit të Republikës së Kosovës. Megjithë këtë ata thonë se kjo është e drejtë e tyre, sikurse e çdo secilit qytetar.

Njohësit e proceseve integruese konsiderojnë se pajisja e zyrtarëve shtetërorë me dy nënshtetësi nuk paraqet ndonjë problem, porse ata nuk e përjetojnë atë që e përjetojnë qytetarët kur duan të udhëtojnë jashtë vendit. Ndërkohë sa i përket heqjes së vizave ekspertët vlerësojnë se gjasat janë të vogla që gjatë këtij viti të ndodhë një e gjë e tillë, respektivisht të finalizohet procesi i liberalizimit. Deputetët thonë se është e drejtë e tyre t’i kenë dy nënshtetësi. Deputeti i LDK-së, i cili ka nënshtetësi të Shqipërisë, Arben Gashi, ka thënë për “Zërin” se një gjë e tillë është çështje personale dhe se nënshtetësinë e ka qysh para më shumë se 20 vjetësh. “Ajo është çështje personale. Unë shtetësinë e kam marrë në vitin 1996. Nuk ka të bëjë asgjë me qenien ose me mosqenien time deputet. Nga këndvështrimi im nuk ka të bëjë me faktin që unë jam deputet e jam bërë shtetas i Shqipërisë, shtetas i Shqipërisë jam bërë në vitin 1996”, ka deklaruar Gashi.

Edhe shefi i Grupit Parlamentar të AAK-së, Ahmet Isufi ka pohuar për “Zërin” se ka nënshtetësi të Shqipërisë, por një gjë e tillë është e drejtë e secilit qytetar. “Është e drejtë e çdo qytetari të kenë shtetësinë ku qëndrojnë, por po ashtu të kenë edhe shtetësi të dytë e kjo është e drejtë themelore e çdo qytetari”, ka deklaruar ai.

---