Presidentja e Kosovës: Kërkesa e Listës Serbe për pezullimin e Kuvendit, e panevojshme

EPA/TOMS KALNINS

Presidentja e Kosovës, Vjosa Osmani, ka reaguar ndaj kërkesës së Listës Serbe, të cilën ja ka drejtuar Gjykatës Kushtetuese për pezullimin e punës së Kuvendit, duke e cilësuar atë si një veprim të panevojshëm që vetëm sa shkakton vonesa të mëtejshme në formimin e institucioneve.

Sipas saj, këto vonesa po i shkaktojnë dëm jo vetëm shtetit të Kosovës, por edhe të gjithë qytetarëve pa dallim, përfshirë edhe komunitetin serb.

“… ka pasur vonesa të jashtëzakonshme në krijimin e institucioneve dhe besoj që kjo është edhe një tentim tjetër për vonesa, të cilat, siç e dini, e kanë vonuar interesin e Kosovës. Janë bërë shumë muaj pa qeveri e cila do të kishte mandat të plotë kushtetues. Krijimi i qeverisë varet krejtësisht nga koalicionet mes partive politike, unë aty si presidente nuk mund të ndërhyj. Vonesa e krijuar që po tentohet të krijohet nga Lista Serbe i dëmton interesat jo vetëm të Kosovës si shtet, por të gjithë qytetarëve, përfshirë edhe serbët”, tha ajo, transmeton albinfo.ch.