Presidentja Osmani: Dy shtete, një komb, një zemër

Osmani uron 28 Nëntorin: Historia jonë është shkruar me gjak, guxim dhe besim

Presidentja e Kosovës, Vjosa Osmani, ka uruar popullin shqiptar, në kuadër të Ditës së Flamurit dhe Pavarësisë së Shqipërisë, duke theksuar rëndësinë historike të katër ngjarjeve të shënuara për kombin shqiptar, përcjell albinfo.ch.

 Ajo ka kujtuar Ditën e Flamurit, Pavarësinë e Shqipërisë, lindjen e Komandantit Legjendar Adem Jashari dhe daljen e parë publike të Ushtrisë Çlirimtare të Kosovës (UÇK) si ngjarjet që përbëjnë “boshtin e krenarisë kombëtare”.

Në mesazhin e saj në Facebook, Osmani e ka cilësuar lidhjen mes Kosovës dhe Shqipërisë si të thellë dhe të pandashme, duke i quajtur të dyja shtetet “dy flamuj, por një zemër.

“Nga Kruja e Skënderbeut, te Vlora e Ismail Qemalit dhe Prekazi i Jasharajve, historia jonë është shkruar me gjak, guxim dhe besim. Sot, Kosova e Shqipëria ecin krah për krah: dy shtete, një komb, dy flamuj, një zemër.

Gëzuar Ditën e Flamurit!

Gëzuar Pavarësinë e Shqipërisë!

Lavdi Komandantit Adem Jashari dhe të gjithë heronjve, dëshmorëve e martirëve të kombit tonë!”, shkroi e para e vendit.

---