Rama: Aeroporti i Vlorës do të jetë gati vitin e ardhshëm

Kryeministri i Shqipërisë, Edi Rama, e nisi ditën sot me pamje nga kantieri për ndërtimin e Aeroportit Ndërkombëtar të Vlorës.

Në një postim në Facebook, Rama tha se “po punohet me ritme të shpejta për të qenë gati vitin e ardhshëm”.

Pak ditë më parë edhe zëvendëskryeministrja Belinda Balluku ndau në rrjete sociale një kronikë televizive për Aeroportin e Vlorës, i cili në fund të vitit do të aplikojë për certifikimin e operimit dhe sigurinë, transmeton albinfo.ch.

Që tani ka nisur puna për prokurimin e objekteve që do të plotësojnë funksionimin e plotë të aeroportit, i cili do të nisë fluturimet ne pranverë të vitit 2025.

Në fazën e parë, Aeroporti i Vlorës, do të operojë me një kapacitet prej 2 milionë pasagjerësh. Pas mbylljes së fazës së parë, aeroporti do t’i nënshtrohet edhe dy fazave të tjera që përfshijnë, infrastrukturën për godinën kargo, zgjerimin e terminalit të pasagjerëve, dhe ngritjen e akademisë së fluturimit.

Me një sipërfaqe prej 309 hektarë, pistë 3.2 km dhe me një investim prej 104 milionë euro, porta ajrore e jugut synon t’i japë një tjetër hov zhvillimit të zonës, po veçanërisht turizmit në vend.