Rama: Synojmë 20 milionë turistë në vit

Duke folur për turizmin, Kryeministri Rama deklaroi se Shqipëria ka arritur në 12 milionë vizitorë të huaj dhe se objektivi është që ky numër të rritet në 20 milionë

Kryeministri shqiptar, Edi Rama foli për rritjen ekonomike të Shqipërisë dhe objektivat në turizëm, gjatë takimit me një komunitet shqiptarët në Staten Island në Nju-Jork.

Rama tha se Shqipëria ka kaluar një transformim të rëndësishëm ekonomik gjatë dekadave të fundit, duke e lidhur këtë edhe me kontributin e diasporës.

“Vendi që emigrantët e parë lanë kur erdhën në Amerikë 30 e kusur vite më parë ishte një vend me më pak se 200 dollarë për frymë dhe sot, edhe falë jush, është rritur 75 herë në 35 vjet dhe ambicia ime është që në 2030 ta kemi rritur 100 herë”, u shpreh Rama.

Duke folur për turizmin, Kryeministri Rama deklaroi se Shqipëria ka arritur në 12 milionë vizitorë të huaj dhe se objektivi është që ky numër të rritet në 20 milionë, transmeton albinfo.ch.

Sipas Ramës, krahas numrit të vizitorëve, një rëndësi të veçantë ka rritja e investimeve cilësore dhe të ardhurave që gjenerohen nga turizmi.

“Ajo që është shumë e rëndësishme për ne në këtë fazë është që të kemi më shumë investitorë cilësorë, në mënyrë që të kemi më shumë turistë që sjellin vlerën më të lartë gjatë qëndrimit të tyre”, tha ai.

Rama theksoi se turizmi shqiptar aktualisht karakterizohet në një masë të konsiderueshme nga turistë me të ardhura mesatare dhe të ulëta, ndërsa synimi është rritja e turizmit të vlerës së lartë, përmes investimeve që tërheqin turistë me fuqi më të madhe shpenzuese.

---