Reagon Kuvendi i Shqiptarëve në Zvicër pas ekstradimit të Shemsi Nuhiut në Serbi

Kuvendi i Shqiptarëve në Zvicër shpreh pakënaqësinë me rastin e ekstradimit të Shemsi Nuhiut në Serbi

Sipas Kuvendit të Shqiptarëve të Zvicrës akuzat e ngritura me aktakuzën serbe nuk janë vërtetuar fare. Vet fakti që Gjykata Supreme e Serbisë ka rrëzuar aktakuzën e parë të ngritur kundër Shemsi Nuhiut dëshmon, që provat në të cilat bazohet aktakuza kanë qenë në objekt të kritikës.

Kuvendi i Shqiptarëve në Zvicër mendon që aktakuza kundër Shemsi Nuhiut, si dhe procesi që do i bëhet atij janë të motivuara politikisht. Kuvendi shpreh pakënaqësinë e tij edhe për faktin, që Shemsi Nuhiu është ekstraduar në Serbi, edhe pse bazat ligjore për një proces gjyqësor në Zvicër kanë ekzistuar.

Kuvendi i shqiptarëve në Zvicër është gjithashtu i shqetësuar për kushtet e paraburgimit në Serbi, për shkallën e respektimit të drejtave të njeriut dhe të mbrojtjes juridike. Kuvendi gjithashtu shpreh dyshimin për paanshmërinë dhe objektivitetin e gjykatës. Kushtet mbi të cilat është ngritur aktakuza e parë, para se të anulohet, e mbi të cilën është bazuar ekstradimi, shtyn Kuvendin të mendon, që principet më elementare juridike nuk respektohen mjaftueshëm në Serbi.

Kuvendi i shqiptarëve në Zvicër shpreson dhe kërkon, që autoritetet e shtetit zviceran të përcjellin me kujdes të jashtëzakonshëm rastin e Shemsi Nuhiut, si dhe të këmbëngulin për respektimin e të drejtave të njeriut dhe të procedurave penale, si në një shtet demokratik dhe të së drejtës, përfundon komunikata e Kuvendi.