Referendumi për azilin, përçan të majtën

Pozita e azilkërkuesve, pas referendumit do të përkeqësohet, ka thënë Levrat, duke kundërshtuar iniciativën nga e majta

Kryetari i Partisë Socialdemokrate, Christian Levrat e konsideron të dëmshëm referendumin e paralajmëruar nga qarqet e majta kundër ligjit të ashpërsuar të azilit. Pozicioni i azilkërkuesve, në rast të humbjes në referendum (që sipas tij është e pritshme) vetëm sa do të përkeqësohet , ka thënë Levrat në një debat të zhvilluar në radion zvicerane DRS.

Kjo do të bëhet aq më tepër pasi që ende janë në procedurë ndryshime të tjera të ligjit të azilit, që shkojnë drejt ashpërsimit.

Seksione të ndryshme të partisë së tij janë vënë në mbështetje të referendumit, duke u pozicionuar kështu kundër udhëheqjes së partisë. Ato tashmë kanë filluar grumbullimin e nënshkrimeve për iniciativën e kundërshtimit të ligjit të azilit.

Ligji i reviduar i azilit tashmë është në fuqi, për shkakun se parlamenti e kishte shpallur atë si ligj emergjent.

Rregullimi i ri i mundëson federatës që azilkërkuesit t`i vendosë në një qendër të përbashkët, në rast se e rrezikojnë rendin publik ose punën e një qendre të azilit.

Ndër risitë e ligjit të ri është edhe ndalimi i kërkimit të azilit në përfaqësitë diplomatike të Zvicrës jashtë vendit dhe mosnjohja e statusit të refugjatit personave që kanë dezertuar nga ushtria.

Referendumin kundër ligjit të ashpërsuar të azilit e kanë ndërmarrë organizatat e migrantëve bashkë me të gjelbrit dhe organizata të ndryshme majtiste.