Serbia kërcënon me luftë, reagon Kryeministri i Shqipërisë

Keystone (AP Photo/Franc Zhurda)

Kryeministri i Shqipërisë, Edi Rama, ka reaguar ashpër pas kërcënimeve të ministrit serb të Mbrojtjes ndaj stabilitetit dhe integritetit të Maqedonisë së Veriut dhe Malit të Zi, duke e konsideruar deklaratën e Vuçeviç të rrezikshme dhe të papranueshme.

“Kërcënimet kundër stabilitetit dhe integritetit të Maqedonisë së Veriut dhe Malit të Zi janë të rrezikshme dhe të papranueshme. Të mos harrojmë se Shqipëria, Maqedonia e Veriut dhe Mali i Zi janë aleatë të NATO-s plotësisht të përkushtuar ndaj sigurisë dhe integritetit territorial të njëri-tjetrit. Ne kemi arritur në dekadën e fundit në këtë rajon atë që askush nuk mund ta imagjinonte në dekada të pafundme më parë dhe nuk mund dhe nuk do të lejojmë askënd të na tërheqë prapa në të shkuarën që po e lëmë pas përgjithmonë! Së bashku! Evropa e Madhe është e ardhmja jonë e vetme”, shkruan Rama, përcjell albinfo.ch.

Vuçeviq tha se Mali i Zi dhe Maqedonia e Veriut e zemëruan Serbinë aq shumë kur njohën shtetin e Kosovës, saqë për këtë veprim duhet të goditen sikur po goditet Ukraina.

“A po flenë të qetë miqtë tanë në Maqedoninë e Veriut? A po flini mirë? Ata (Mali i Zi dhe Maqedonia e Veriut) mendojnë se janë në paktin e NATO-s dhe i kanë zgjidhur problemet e tyre…. Kjo është karma e Malit të Zi dhe Maqedonisë së Veriut. Kur u bënë anëtarë të kësaj aleance të sigurisë kolektive ose të NATO-s, ata menduan se i kishin zgjidhur të gjitha problemet e tyre dhe se asgjë nuk mund t’u ndodhte më atyre”, thotë Vuçeviq.

Paralajmërimi se Maqedonia e Veriut dhe Mali i Zi mund të përballen me probleme dhe se nuk do të qëndrojnë të qetë edhe nëse janë anëtarë të NATO-s, duhet të jetë shqetësues për Aleancën Veriatlantike, veçanërisht kur vjen nga Ballkani Perëndimor, i konsideruar prej kohësh ‘fuçi baruti’ në Evropë, përcjell albinfo.ch.