Familjet amerikane kanë përjetuar rritje të të ardhurave dhe të pasurisë gjatë periudhës 2022–2025, por përfitimet janë shpërndarë në mënyrë të pabarabartë, ndërsa presioni financiar dhe vështirësitë me shlyerjen e borxheve janë shtuar.
Këto janë gjetjet e anketës së fundit të Rezervës Federale amerikane, e cila analizon gjendjen financiare të familjeve në të gjithë vendin.
Sipas raportit, të ardhurat mesatare të familjeve, të përshtatura me inflacionin, u rritën me 7% gjatë tre viteve, duke arritur në 82,200 dollarë. Edhe pasuria neto mesatare u rrit me 2%, në 215,900 dollarë. Megjithatë, rritja e pasurisë ishte më e përqendruar te familjet që zotëronin tashmë më shumë asete, ndërsa një pjesë e familjeve me të ardhura të ulëta mbetën në vështirësi.
Familjet në 25% e poshtme të shpërndarjes së pasurisë panë vlerën e tyre neto të binte me më shumë se gjysmën, nga 3,800 dollarë në vitin 2022, në vetëm 1,700 dollarë në vitin 2025. Ndërkohë, pasuria mediane e familjeve me kryefamiljarë me ngjyrë ra me 25%, pas rritjes së fortë prej 60% në periudhën 2019–2022. Në të kundërt, familjet ku anëtari kryesor ishte mbi 75 vjeç regjistruan rritje të pasurisë me 37%.
Anketa evidenton gjithashtu shtimin e vështirësive për përballimin e detyrimeve financiare. Pagesat mediane të borxhit si pjesë e të ardhurave u rritën me 2 pikë përqindjeje, në 15.4%, ndërsa raporti i borxhit ndaj të ardhurave arriti në 94.9%, nga 89.4% në vitin 2022.
Përqindja e familjeve që shpenzojnë më shumë se 40% të të ardhurave për pagesat e borxheve u rrit nga 6.5% në 8.6%, niveli më i lartë që nga viti 2013. Po ashtu, pjesa e familjeve që raportuan vonesa në shlyerjen e kredive u rrit nga rreth 12% në pothuajse 20%. Përdorimi i skemave “bli tani, paguaj më vonë” u zgjerua nga 7% në 12%.
Të dhënat tregojnë se, ndonëse tregu i punës pas pandemisë ndihmoi në rritjen e pagave, veçanërisht për punonjësit me të ardhura më të ulëta, inflacioni dhe normat e larta të interesit vazhduan të rëndonin buxhetet familjare. Të ardhurat reale të 60% të familjeve në pjesën e poshtme të shpërndarjes u rritën me 4% deri në 7%, ndërsa 10% e familjeve me të ardhurat më të larta regjistruan një rënie reale prej 6%.
Ndërkohë, niveli i pronësisë së banesave mbeti i qëndrueshëm, në rreth 66%, ndërsa pjesëmarrja në tregun e aksioneve ra lehtë, nga 58% në vitin 2022, në 56% në vitin 2025. Sipas Rezervës Federale, rezultatet pasqyrojnë një ekonomi ku rritja e përgjithshme e të ardhurave dhe pasurisë nuk është shoqëruar me përmirësim të njëjtë të sigurisë financiare për të gjitha familjet.
