Shqipëri: Certifikatat e vaksinave anti-Covid shiten në TikTok

Çmimi i ofruar për një certifikatë vaksinimi sikur të kesh bërë dy vaksina është 300 euro.

Falsifikime të testeve të COVID, apo gjetja e mënyrave duke korruptuar mjekë të caktuar, në marrjen e certifikatës së vaksinimit ka gjithandej.
Në rubrikën Ti Rapoton të TopChannel ka ardhur një denoncim për një faqe në rrjetin social TikTok që reklamon kundrejt pagesës certifikata vaksinimi, transmeton Albinfo.ch.

Personat mbrapa këtij biznesi kriminal, me qendër në Kavajë për të joshur njerëzit, kanë vendosur si logon e E-Albania si foto të llogarisë të tyre.

Reklamimet e biznesit të certifikatave të vaksinimit të falsifikuara, përmes kësaj llogarie kanë nisur në mesin e muajit janar.
Në njërën prej tyre shkruhet:
“Doza vaksinimi 100% të sigurta për të lëvizur nëpër Europë. 1-2-3 doza sa të dëshironi. Për më shumë informacion, na kontaktoni”.

Shtrirja e këtij grupi kriminal në këtë lloj biznesi nuk është vetëm në Shqipëri, kjo lihet të kuptohet nga një tjetër reklamë e tyre në TikTok.
“Bëjmë doza vaksinash në të gjithë Europën 100% të sigurta”.
Nuk mungojnë garancitë për ata që duan të kenë në xhep një certifikatë vaksinimi të blerë.
“Vaksina Covidi 100%  kalimtare nëpër Europë me garanci. Mesazh direkt për më shumë informacion”.

Çmimi i ofruar për një certifikatë vaksinimi sikur të kesh bërë dy vaksina është 300 euro. Janë të shumtë ata që kanë kontaktuar me mesazhe këtë faqe në TikTok  për të blerë këtë lloj shërbimi.

Por njëri prej tyre në koment thotë:
“Mos i merrni njerëzit në qafë kot se do fshihen këto falsot dhe do të ngeleni rrugëve dhe pa vaksina të vërteta për t’u mbrojtur”.

 

---