Shqipëri: Katër të vdekur dhe 296 të infektuar nga COVID-19

Keystone EPA/MALTON DIBRA

Ministria e Shëndetësisë dhe Mbrojtjes Sociale në Shqipëri bëri të ditur se në 24 orët e fundit janë kryer 1874 testime, nga të cilat kanë rezultuar pozitivë me COVID19, 296 qytetarë. Janë 8,773 pacientë aktivë me COVID19 në të gjithë vendin.

Sipas MSHMS-së, aktualisht në spitalet COVID po marrin trajtim 129 pacientë, nga të cilët 17 janë në gjendje më të rënduar.

Në 24 orët e fundit me gjithë përpjekjet e stafit mjekësor ka katër humbje jete me SARS-COV2 pozitiv: një qytetare nga Berati 53 vjeçe, një qytetar nga Kurbini 54 vjeç, një qytetare nga Tirana 83 vjeçe, një qytetar nga Durrësi 83 vjeç.

Janë shëruar 835 qytetarë gjatë 24 orëve të fundit, duke e çuar numrin e të shëruarve në 256,117 që nga fillimi i epidemisë.