Shqipëri: Vajza që u plagos nga babai në Lushnjë, në gjendje të rëndë

40-vjeçarja Rudina Musaku, e cila u plagos nga babai i saj, është në gjendje të rëndë shëndetësore dhe për këtë arsye ajo është nisur drejt Spitalit të Traumës në Tiranë për mjekim më të specializuar, transmeton albinfo.ch.

Gjatë ditës së sotme ka ndodhur ngjarja e rëndë në Lushnjë, ku 82-vjeçari Behar Musaku plagosi në bark vajzën e tij, e më pas kreu vetëvrasje, raporton TCH.

Sipas raportimeve nga vendi i ngjarjes, dyshohet se shkak për këtë tragjedi është bërë një debat mes viktimes dhe babait të saj.

Ndryshe, ajo ishte e divorcuar dhe me fëmijë dhe kishte ardhur për të qëndruar tek prindërit e saj. Ajo jetonte në Tiranë me qira, ndërsa dy fëmijët e mitur jetonin me babain e tyre.