Shqipëria dhe Kosova shpresojnë në rezultat pozitiv

Kuqezinjtë dhe Dardanët sonte me ndeshje shumë të rëndësishme në kualifikimet për Kampionatin Botëror

Shqipëria kërkon të harrojë ndeshjen me Poloninë dhe beson në rezultat pozitiv ndaj Hungarisë. Ndeshja do të zhvillohet nga ora 18:00 në Elbasan, ku pas më shumë se një viti e gjysmë do të ketë një numër të kufizuar tifozësh, përcjell albinfo.ch.

Kuqezinjtë pas katër ndeshjesh kanë gjashtë pikë, ndërsa hungarezët shtatë.

“Kemi një ndeshje për ta përmirësuar rezultatin e padrejtë që e patëm në Poloni. Pres ndeshje të mirë nga skuadra ndaj Hungarisë. Duhet të bëjmë paraqitje ashtu siç bëmë në Poloni. Nëse e shikojmë rezultatin 4:1 duket sikur na kanë masakruar, por në fakt nuk ishte ashtu. Skuadra bëri paraqitje të mirë. Po atë frymë dëshiroj ta shoh edhe të dielën”, tha përzgjedhësi Edy Reja.

Shqipëria në këtë duel do të ketë mungesa. Elseid Hysaj, Rey Manaj dhe Keidi Bare janë të suspenduar për këtë ndeshje. Sidoqoftë, tekniku italian do ta ketë në përbërje Nedim Bajramin që e mori dritën e gjelbër për ta përfaqësuar Shqipërinë. Bajrami pritet të jetë titullar te Shqipëria ndaj Hungarisë.

Ndërkohë, Kosova pas fitores ndaj Gjeorgjisë, shpreson në një tjetër fitore, kësaj radhe ndaj Greqisë, takim që zhvillohet nga ora 20:45 në Prishtinë, ku do të lejohen 10 % e tifozëve.

“Ndeshja me Greqinë është e rëndësishme për ta konfirmuar ndeshjen e mirë në Gjeorgji. Luajmë ndaj një ekipi me lojë e lojtarë të mirë. Duhet të tregojmë edhe një herë lojë të mirë e të fortë. Ndeshja e parë ishte e mirë. Ndeshja e dytë nuk duhet të jetë problem, nuk kemi shumë lojtarë me lëndime. Rigjenerimi shkoi shumë mirë. Ishte përgatitje e mirë për ndeshjen e dytë. Ndeshja e tretë do të jetë e vështirë. Duhet të kemi kujdes edhe nga kartonët. Lojtarët janë gati për duelin e së dielës”, deklaroi zvicerani Bernard Challandes.

Dardanët pas tri ndeshjeve kanë tri pikë, ndërsa grekët pas dy ndeshjeve dy pikë.

---