Shqipëria pas stuhisë: Shtohet fondi për fatkeqësitë natyrore

Edi Rama, FB

Buxheti i vitit 2024 në Shqipëri, për të përballuar fatkeqësitë natyrore buxheti do të rritet. Në total për fatkeqësitë natyrore dhe digat për vitin 2024 planifikohen të shpërndahen 2.5 miliardë lekë nga 2 miliardë lekë që është fondi i parashikuar për këtë vit, përcjell albinfo.ch.

Emergjencat Civile do të marrin 5.3 miliardë lekë në vitin 2024 nga 4.3 miliardë lekë i parashikuar për këtë vit.

Fondet për programin e Emergjencave Civile janë pjesë e buxhetit të parashikuar për Ministrinë e Mbrojtjes. Nga ky fond 800 milionë lekë do të shpërndahen për njësitë vendore, në bazë të madhësisë së bashkive, dhe do të përdoren për fatkeqësitë natyrore, por bashkitë janë të detyruara ligjërisht që një pjesë tjetër nga të ardhurat e tyre, ta përdorin për emergjencat, raporton TCH.

Në buxhetin e emergjencave janë 1 miliard lekë që do të përdoren për projekte për të parandaluar fatkeqësitë natyrore, si zjarre, përmbytje dhe tërmete, teksa për të përfituar nga ky fond bashkitë duhet të aplikojnë nga nëntori i këtij viti deri më 31 janar 2024, ndërsa fituesit shpallen para 15 shkurtit.

Ndryshe, vlerësimi i projekteve bëhet nga Komisioni për Parandalimin dhe Menaxhimin e Fatkeqësive Natyrore.