Shqiptari shpëton të dehurin nga treni

Një i ri 27 vjeçar, i dehur, që kishte humbur orientimin, po ecte nëpër binarë drejt një tuneli të trenit, në Wittenbach të St.Gallenit.

Një kalimtari të kujdeshsëm i kishte rënë në sy i dehuri që po shkonte drejt rrezikut të drejtpërdrejtë dhe kishte bërë veprimin e guximshëm: Ai ka vrapuar pas tij dhe e ka tërhequr nga tuneli, ku për çdo moment mund të kalonte treni, që do të kishte pasoja fatale për të dehurin.

Shpëtimtari, sipas burimeve tona është shqiptar, me inicialet L.D. dhe është 32 vjeç.

I dehuri do të paditet për çrregullim të rendit në trafik. Sipas përgjegjësit për medie në policinë e kantonit të St.Gallenit, Hanspeter Krüsi, i dehuri nuk është në gjendje të shpjegojë përse ka ecur drejt tunelit. Qajo që dihet me siguri, është se ai ka qenë nën ndikimin e fortë të alkoolit.

Ndërsa sa i përket shqiptarit që ka treguar guxim qytetar, Krüsi thotë se ai do të shpërblehet për kujdesin e treguar.