Shqiptari vret gruan në Greqi, autoritetet në ndjekje të tij

Një ngjarje e rëndë ka ndodhur mëngjesin e së premtes në qytetin Volos të Greqisë, ku një shtetas shqiptar ka vrarë bashkëshorten e tij dhe më pas është larguar me nxitim nga vendi i krimit.

Policia greke ka rrethuar zonën dhe po zhvillon kërkime intensive për kapjen e autorit, i cili është parë duke u larguar drejt rrugës Gladstone.

Ngjarja u bë e ditur nga vajza e viktimës, e cila në gjendje shoku telefonoi urgjencën pasi pa nënën e saj të mbuluar me gjak në hyrje të pallatit.

Sipas mediave lokale, autori kishte pasur më parë probleme të shëndetit mendor dhe ishte trajtuar për to, megjithëse nuk dihet ende se çfarë e shkaktoi konfliktin mes çiftit.

Banorët e zonës shprehen të habitur, pasi familja nuk kishte krijuar kurrë shqetësime dhe ishte e njohur për marrëdhënie të qeta me fqinjët.