Shumë zviceranë nuk i dinë faktet rreth vaksinimit

Shumica e njerëzve në Zvicër nuk janë të informuar sa duhet rreth vaksinimeve, sipas një studimi.

Të dielën, gazeta “NZZ am Sontag” raportoi se më shumë se gjysma e popullsisë në Zvicër nuk i dinë faktet rreth vaksinimit.

Artikulli i referohej një sondazhi ende të papublikuar të Universitetit të Luganos, në kuadër të Zyrës Federale të Shëndetit Publik, shkruan swissinfo, përcjell në shqip albinfo.ch.

Për shembull, kur ata u pyetën se a është e vërtetë se “Sistemi imunitar nuk është i ngarkuar nga vaksinat e shumta përgjatë fëmijërisë”, 23 për qind e tyre e cilësuan “gabim”, 33 për qind u përgjigjën “nuk jam i/e sigurt”, e sipas shkencës, ajo e dhënë qëndron, pra është e vërtetë.

Po ashtu, 11 për qind e të anketuarve u pajtuan me deklaratën se “vaksinat mund të shkaktojnë sëmundje të tilla si autizmi, skleroza e diabeti”. Kjo deklaratë nuk qëndron, por u bë me qëllim të matjes së njohurive të tyre, përcjell albinfo.ch.

Gazeta po ashtu theksoi se skepticizmi popullor po ushqehet nga kundërshtarët radikalë të vaksinimit, të cilët po e mbizotërojnë debatin në platformat e internetit.