Spiunazh ekonomik në dëm të Zvicrës

Personi i inkriminuar kishte punuar në fushë të informatikës në kuadrin e shërbimit informativ

Një punëtor i shërbimit informativ federal të Zvicrës ka provuar t`i shiste jashtë vendit të dhënat e vjedhura të punëdhënësit të tij (shtetit zviceran).

Prokuroria Federale e konsideron këtë zhvillim si rast të rëndë të spiunazhit ekonomik që shkon në dëm të Zvicrës.

Të dhënat në fjalë kanë qenë të destinuara për të rrezikuar sigurinë e Zvicrës, ka thënë kryeprokurori federal, Michael Lauber për mediet zvicerane. Personi i inkriminuar kishte punuar në fushë të informatikës në kuadrin e shërbimit informativ. Në fillim të verës që shkoi, ai kishte vjedhur të dhënat e përmendura, në një vëllim të madh.

Ndonëse rastet e dështimeve në fushë të sigurisë, sikur ky i fundit sensibilizojnë me të madhe opinionin, mashtruesit gjithmonë gjejnë një zbrazësirë për të kryer punën e tyre, ka thënë për radion DRS eksperti i sigurisë IT, Cornel Furrer.

Njoftimet më të reja flasin për atë se banka UBS ka meritat për zbulimin e kësaj afere spiunazhi. Sipas këtyre njoftimeve, drejtori i Shërbimit, Seiler ka qenë i njoftuar me kohë për zbulimin por nuk ka ndërmarrë veprimet e duhura.

Nga ana tjetër, ministri i mbrojtjes, Ueli Maurer ka marrë në mbrojtje z. Seiler.