Spiunët rusë në Shqipëri: Nga ngjarja në Gramsh, tek ‘Defender Europe 21’

Ngjarjet në Gramsh e Poliçan nuk përbëjnë të parën herë kur shtetas rusë e cekë i kushtojnë një vëmendje jo të zakontë objekteve ushtarake e uzinave të armëve në Shqipëri e përpiqen të sigurojnë pamje të tyre.

Vitin që shkoi autoritetet shqiptare nisën të hetonin dy shtetas rusë e pesë çekë nën dyshimet për spiunazh ushtarak të kryer gjatë stërvitjes “Defender Europe 2021”. Asokohe u tha se çekët kishin qenë duke fotografuar bazën e NATO-s në Kuçovë si dhe stërvitjet e trupave amerikane në Durrës. Dy shtetas rusë u vendosën po kështu nën hetim nga Prokuroria e Tiranës; njëri prej tyre, Vladislav Cherkasov, kishte hyrë në vend më 12 maj të vitit të kaluar dhe me vete iu gjet një dron. Si destinacion të tij kishte shpallur Durrësin, e kjo pikërisht në kohën kur atje zhvillohej stërvitja e rëndësishme ushtarake.

Georg Budanov sakaq hyri në Shqipëri përmes Qafë Thanës më 1 mars 2021. Ai u prezantua si biznesmen që ishte i interesuar të investonte në qytetin e Vlorës. Por veprimtaria e tij me gjithë informacionin sekret, shikohet e dyshimtë nga hetuesit që dyshojnë se Budanov qëndroi në Orikum gjatë kohës që në Vlorë kryhej Defender Europe, një nga stërvitjet më të mëdha ushtarake e zhvilluar në Evropë. Rusi u dëbua nga policia kufitare qendrore më 10 maj, nën argumentin që nuk përmbushte kushtet e qëndrimit në Shqipëri. Ministria e Jashtme ruse reagoi asokohe me akuzat se e gjithë kjo nuk ishte gjë tjetër, sipas saj, veçse propagandë e NATO-s./tch