Stjuardesa e British Airways, nën efektin e alkoolit dhe lëndëve narkotike

Piloti merr në telefon policinë

Mediat britanike raportojnë se një stjuardesë e kompanisë ajrore British Airways është vënë në pranga, pasi akuzohet se ishte nën efektin e alkoolit dhe lëndëve narkotike gjatë detyrës së saj në udhëtim e sipër, përcjell albinfo.ch.

Thuhet se oficerët e policisë së Sussex zbarkuan në aeroportin e Gatwick dhe ndaluan stjuardesën që vinte nga Gran Canarie, pas një telefonate që morën nga piloti i avionit, se një prej punonjëseve nuk ishte në gjendje të kryente detyrën e saj.

Referuar mediave britanike, kolegët e gruas ndihmuan policinë që ta shoqëronte pasi ajo dyshohej që edhe në ato momente të ishte ende nën efektin e narkotikëve.

Ata tregojnë se piloti u detyrua të njoftonte policinë, pasi stjuardesa nuk ishte në gjendje të punonte dhe t’iu ofronte siguri pasagjerëve.

Gruaja 41-vjeçare u shoqërua në polici, ndërkohë që një hetim ka nisur ndaj saj.

---