Tiranë: Policia publikon pamje nga sekuestrimi i dy automjeteve, u vodhën në Gjemani e Zvicër

Foto sc FB

Policia e Shtetit në Tiranë ka sekuestruar dy automjete në vlerë 120 mijë euro, që dyshohet se u vodhën në Zvicër dhe Gjermani.

Sipas njoftimit, lidhur me këtë janë identifikuar dhe proceduar penalisht dy shtetas.

“Si rezultat i punës hetimore dhe operacionale, kryer në vijim të operacionit ‘Stolen line’, me objektiv goditjen e rasteve të trafikimit në Shqipëri, të automjeteve të vjedhura jashtë shtetit, specialistët e Seksionit për Hetimin e Trafiqeve të Paligjshme goditën dy raste të tjera të kësaj veprimtarie kriminale. U sekuestrua 1 automjet tip ‘Audi SQ8’, me vlerë rreth 70 000 euro, i cili nga verifikimet rezultoi i vjedhur në Gjermani. Për këtë rast nisi procedimi penal për shtetasin H. P., 29 vjeç, i cili dyshohet se ka sjellë automjetin, në Shqipëri, me qëllim shitjen. U sekuestrua 1 automjet tip ‘BMW’, me vlerë rreth 50 000 euro, i cili nga verifikimet rezultoi i vjedhur në Zvicër. Për këtë rast nisi procedimi penal për shtetasin K. B., 50 vjeç, i cili dyshohet se ka sjellë automjetin, në Shqipëri, me qëllim shitjen”, thuhet në njoftim, transmeton albinfo.ch.

Bëhet e ditur se operacioni “Stolen Line” vijon.