Nga Vlora në Tiranë, turistët kanë zgjedhur të qëndrojnë jo dy apo tre ditë, por edhe dy javë duke eksploruar destinacionet që vendi ynë ofron, plazhet, malet dhe natyrën e bukur shqiptare nga mali te deti.
Një nga turistet shprehet se ka ardhur në Shqipëri rreth një javë më parë dhe mendoj një nga gjërat e saj më të preferuara në Shqipëri ishte të shkuarit nëpër male. “Tani jam në Tiranë dhe fatmirësisht, mbase për disa ditë, do të shkoj në plazh dhe jam e sigurt që do të jetë shumë bukur. Shqipëria është e mrekullueshme, më pëlqeu shumë këtu”, thotë ajo.
Një tjetër turist shprehet se ka rreth dy javë që qëndron në vendin tonë dhe e cilëson Tiranën një vend me shumë kultura. “Një arkitekturë ndryshe nga çdo vend tjetër në botë. Kështu që mendoj që është një vend shumë interesant dhe po e shijoj shumë kohën këtu”, shkruan ATSH, transmeton albinfo.ch.
“Në fillim shkuam te Liqeni Artificial, më pas te Bunk’ Art, Muzeu më vonë. Tani erdhëm këtu në qendrën e qytetit. Një vend i mrekullueshëm, shumë vende fotozhenike. Kemi bërë shumë foto dhe kemi kujtime shumë të bukura kur të kthehemi në qytetin tonë”, shprehet një tjetër turist.
Sheshi “Skënderbej” ku ndërthuret e shkuara me modernen është një nga pikat më të frekuentuara për vizitorët e huaj.
“Shoh disa ndërtesa që janë uau. Janë shumë të bukura. Për shembull kjo pas meje, nuk e kisha menduar që është fytyra e një personi. Është mbresëlënëse dhe kur e fotografova dhe e pashë përsëri, thashë ‘Oh, qenka një fytyrë.’ Shumë vende, shumë gjëra për t’u shijuar këtu. Uroj që çdo person ta shijojë Shqipërinë. Do t’ju pëlqejë shumë”, shprehet një nga turistët.