U shënua 15-vjetori i Pavarësisë së Kosovës me atmosferë festive në Frankfurt

Në mbrëmjen e organizuar nga Konsullata e Përgjithshme e Republikës së Kosovës në Frankfurt am Main ishin të pranishëm kryetarë shoqatash, afaristë, intelektualë dhe veprimtarë nga diaspora shqiptare.

Me fjalim rasti për nder të Ditës së Pavarësisë atyre iu drejtua Konsulli i Përgjithshëm, Gëzim Gashi, i cili ndër të tjera tha se ky përvjetor Kosovën e gjen me shumë të arritura, të cilat janë motiv për të punuar edhe me shumë. Arritjet dhe sukseset janë rezultat i pëpjekjeve të pareshtura dhe e punës së përbashkët të institucioneve tona dhe qytetarëve të saj, në të cilat diaspora jonë zë vend meritor.

Për pjesën artistike të programit të kësaj feste u përkujdes vokalisti dhe instrumentisti i shquar, Bekim Gashi, ku prezantoi dhe shoqëroi me kitarë, artistët e shquar shqiptarë që po shkelqejnë në skenat e mëdha të muzikës klasike në Gjermani: Etleva Shemai, Kushtrim Gashi dhe Adelina Lushaku Hashani.

Me disa këngë të përzgjedhura nga repertuari i muzikës së lehtë shqiptare, të interpretura me me nivel të lartë artistik, ata u mirëpritën nga të gjithë të pranishmit, duke i shoqëruar në interpretim dhe ovacione.