Vdes në spital indiania e përdhunuar

Së paku gjashtë meshkuj e kishin sulmuar para dhjetë ditësh studenten e mjekësisë duke e goditur me shufra hekuri dhe nxjerrë nga autobusi ku ajo ndodhej

Ka ndërruar jetë studentja 23 vjeçe nga India, e cila ditë më parë qe dhunuar seksualisht nga disa burra. Ajo nuk ka mundur t`u bëjë ballë lëndimeve të rënda të trurit dhe infeksionit të mushkërive që kishte pësuar nga dhunuesit, njoftojnë mjekët nga klinika speciale e Singapurit ku ajo po trajtohej. Para se të çohej në Singapur, ajo ishte operuar tri herë në Nju Delhi.

Së paku gjashtë meshkuj e kishin sulmuar para dhjetë ditësh studenten e mjekësisë duke e goditur me shufra hekuri dhe nxjerrë nga autobusi ku ajo ndodhej.

Një valë protestash kishte vërshuar Indinë pas këtij krimi të rëndë.

Pas vdekjes së studentes ka reaguar edhe kryeministri i Indisë, Manmohan Singh. Ai ka thënë se kjo vdekje do të ketë konsekuencat e veta. Emocionet e shkaktuara nga ky rast brutal duhet të shfrytëzohen për një kthesë të shoqërisë, ka thënë ai. Për të çuar në vend nderin për viktimën duhen ndërmarrë hapa konkretë. Qeveria po e shqyrton mundësinë e rritjes së dënimit për përdhunuesit seksualë.